A l'iniciativa de la bibliotecària e d'una regenta, los escolans qu'o desiran son convidats, un còp cada quinze jorns, a s'acampar per escambiar sos vejaires suls libres legits pels uns o pels autres, encadrats per 2 regentas.

Installats dins lo canton de lectura, los participants an la causida d'escotar sonque, o de presentar un libre (album, roman, documentari, B.D....) Cadun se pòt puèi exprimir a prepaus del libre o sul subjècte.

Lo nombre de presentacions es limitat : permet tanben d'acordar a cadun mai de temps, de pausar mai de questions e, adonc, de trabalhar mai en pregondor. Abans lo repais, lo president de sesilha (un escolan lo mai sovent) marca los qu'o vòlon.

Un album es presentat per una de las doas adultas, legit d'afons sus mai d'una sesilhas. Los títols son causits segond l'atge dels participants, per la qualitat del tèxt e dels imatges tan coma per la riquessa de la reflexion e dels dialògs que son a mand d'endralhar.